كان صوت ( عبير نعمه ) بيمُر فيا من مكانٍ ما
وعبير ف ظني - عود قرنفل خام –
بصيت بقلبي من فراغ ف الروح
على كدمة زرقا بايته من أيام
كان القمر خامل
كامل ومش كامل
وكإنه قطن ف غيط سواد كاحل
باسرد حكاية الرحلة والراحل
من غير اضافة سطر أو نقصان
بخيال مؤلف مش خيال شاعر
باكتبني عنها بصمت كله كلام
اعرف نساء الأرض واعرفها - مش ست قد ماهي سرب حمام
كان قلبي يوسع لما بتزورني
وان هي تهجرني ، تهجرني نفسي وتمشي تتبعها
شوفتوني فيها وهي بالأزرق ؟
الحلوة فص ف خاتم الدنيا
شلال زمرد في جزر خضراء
اوصف جمالها الخالص الوضّاء
بضمير مهاجر أو هدوء منُشد
اكتبلكم عنها – واكتبلكم عني
عن واحدة حتي سكوتها بيغني
كان تاني ليل الضُمُه من خيط نهار ماطلعش
تلتين رصيد البُن ف العالم راودوني عن نفسهم
ف طاوعتهم
واديني رايح جي ف الأوضه باعمل تلاتة سهرانين مع بعض
واحكيلي واسمع لما اخر الليل
الوقت خطوة سلحفه خايفه
كان كلي هي وهي مش شايفه
قاعد لوحدي ف شارع النزهة
بشرب مساحتي من أنا الناقصة
وبابُص للالوان بعنيكي ع الواسع
يتنهد الجرسون وهو بيقوللي : أهلاً يافندم بيك
دي تاني مرة الاقيك قاعد هنا عصفور
تحب اوطّي النور
تحب اعلى النار
اخد كلامه هزار واضحك بصوت مُفتعل
كان الغياب اشتعل
وكنتي عند الباب
شكلك كأول يوم
حزنك كآخر يوم
مريتي وسط غيوم واغاني وزباين
وماكنش شيء باين الا الزعل من شيء
وقف المكان ثابت
ايد الكمان سابت
وبقيتي ماشيه والبشر واقفين
متعطل الجرسون بالقهوة علي ايده
بيوطي طفل على البلاط مايقومش
ايد الكاشير ماسكه حساب زبونين
وزبونة فاتحة عنيها وضع ثبات
بس انتي برضه مكمله سيرك
عرفت اني ساعتها من غيرك
وبإني بائس والمكان خيالات
باضحك عليا من مكان مهجور
وبابص للأشياء بحكمة ونور
باجمع بواقي علاقة ماكتملتش
واغاني بعد فراقها ماتغنتش
واضحك لإن الضحك حُب بديل
ولإن من حقي اتأمل التفاصيل
فيه ناس كتير متعلقين فيا
متعلقين بيا
أهلي وأصحابي
صوت ام كلثوم بعد واحدة الصبح
مثلاً طريق اسكندرية لما اروح مشتاق
كلبة صديقتي الطيبة الخايفه
أو صوت عبير نعمة
محتاج لوقت جديد اكذب علي العالم
جسمي لازال مش كامل النيكوتين
فيه حاجات نسيتها واحنا متفارقين
بكل هذا التصالح باكتمل ناقص
بكل هذا التصالح باكتب الآتي
لو يسألوك ع الروح
احجز كراسي ف حفلة الحجار واكتب عليها يُمنع التصوير
أو سيب اغاني منير دايرة على الفاضي
اشرب سجاير وانفخ الذكرى
واوصف لبكره شكل طفل ماجاش
لو يسألوك قولهم :
بقا يعني دول كلهم هيموتوا لو غابت
ادي لنفسك أمل سابت أو اتسابت
وقول ليأسك خسرت اديني اهو باقدر
اسم الاغنية : ويسالونك عن الروح
كاتب الاغنية : غير معروف
ملحن الاغنية : غير معروف
غناء : عمرو حسن الدرويش
العربية
