كل ماتريد معرفته عن مقابله المحلفين..

# اساله المحلفين .

..نصائج من تجربة الاخوة الاعضاء

السلام عليكم ورحمه الله وبركاتـــــــه،

حبيت اطرح اليوم موضوع تطرق له الكثير من الاخوة مشكورين في الصفحة، وحبيت اليوم اطرحه عليكم بشكل اوسع للفائدة العامـــه مستفيده من المعلومات اللي طرحوهه الاخوة سابقا مضافا اليه خبرتي الشخصية في مقابلة المحلفين مع المعلومات اللي وصلتني عن طريق الاهل والاصدقاء ..ان شاء الله تستفادون من المعلومات الموجودة ويارب مقابله سهلة للجميع وتفرحون باستلام الموافقه.

طبعا الكل عادة يخوف من مقابله المحلفين ..طبعا المحلفين اكو منهم السهل واكو منهم الصعب...بس صدكوني مرح يجيبولكم اسأله بعيدة عن اللي كتبتلكميا اليوم وطبعا كل شخص واله قصته وكل قصه والهه اسألتهه ،بس اذا انتو بديتو تسولفون وتاخذون راحتكم بعرض الحقائق فحتى المحلف اذا ميريد يسالك انت حتفتحله باب يسالك منه ومعلومات زايده معناهه اساله اكثر وبالتالي تزداد احتمالية ارتكاب اخطاء او تناقضات.

يعني مثلا اكو ناس اذا المحلف سالهم مثلا شلون اجيت العمان اكو ناس اتجاوب بالطيارة ، واكو ناس يجاوبون بالطيارة لان بالسيارة اخاف يكتلوني بالطريق ومنهالحجي فاذا هاي العبارة مال ناس يكتلوني بالطريق اذا ماكانت جزء من قصتك فمباشرة السوآل اللي حيسأللكياه المحلف ليش منو تتوقع مهددك ؟ومنو سامع اجه بالطريق وكتلوه؟ ، وحتدخل انت بمتاهات كان اختصرتهه بكلمه وحدة.

اني اعرف ناس اذا سالو شنو اسمك يذكر اسمه بسطرين ويسأل تريد الخماسي والسداسي...عيني سالناك اسمك شنو كول فلان عود من نسألك شنو اسم ابوك او جدك اذكرهم.

المهم انتو كلكم تعرفون انه كل شي قسمة ونصيب واللي الك ميروح الغيرك بس بنفس الوقت الله سبحانه وتعالى كال للعبد اسعى واني اسعى وياك...يعني اني اعرف ناس لايكلفون نفسهم يسالون على اساله المحلف ولا يدورون بالنت ومن تحجي وياهم يكلولك اللي الله كاتبه يصير ومن يروحون للمحلف ويسالهم ابسط سؤال يطلعون يتباجون وهاي شنو وممتوقعين حيسالونه هيجي سؤال!!

طبعا بيوم مقابلة المحلفين لازم الواحد يكون هناك بالسبعه ونص الصبح وعادة يطلع بال 5 مساءا الا ماندر او قابل من وكت ، هناك ميعرفون عندك جهال لكن في بعض الاحيان يراعون كبار السن...وما احجيلكم شنو شعور الواحد من ينتظر فد 6 ساعات على المقابلة ، شكو كليجة وصمون ونساتل يخلصون ...اول شي الواحد يكعد متشنج وكل دقيقتين يفتح الجنطة يباوع على البراشيم عبالة نص ساعه ويصيحو ..بس ورة 6 ساعات تكوم تكول وينه المحلف حتى نخلص وكل تشنج حيروح وحتهدؤون.

طبعا الثقة بالنفس وسرعه الاجابة عامل جدا مهم بس اي شي ممتأكد منه او تاريخ نسيته كول ما اذكر زين او ما اعرف احسن مما اتجاوب شي يسويلك تناقض عن اللي ذكرته بالمقابلة الاولية او التوطين.

طبعا اوراقك حاول تجيب الاصليات ...مو تنطيهم الاصليات بس راويلهميا...احنه بالمقابلة اشو كالو لتنطونه شهادات الجامعه ...حاول لاتجاوب بسؤال لان انت شغلتك اتجاوب مو تسال اسأله للمحلفين وحاول تستخدم كلمات يفهمهه المترجم حتى يترجم صح لان المترجم عربي واللي يعرف انكليزي ينتبه على المترجم من يترجم...طبعا كل كلمه ذكرتهه بالمقابله الاولية او التوطين حيسالوك عليهه ومو بالتسلسل وباكثر من طريقه وهو نفس السوال فانتبه ومرات يكولولك انت كلت هيجي بالمقابلة الاولية وانت لا كايل ولا حاجي بس حتى يشوفون صدقك واكو محلفين بنهاية المقابلة يكلك اني لا مقتنع بقصتك ولا شي يستفزك يريد ايشوفك اشحتسوي.

دفتر الخدمة جدا مهم وموتجيبو نص اوراقة طايرة لو مواضح...هواية ناس اجاهم تعليق من ورة هالموضوع.

ما اوصيكم سهرو قبل بيوم ولتنامون حتى تروحون دايخين وتكومون لاتربطون باساله المحلف ولا اصلا حيصير عدكم خلك تتحملون كل الاسأله ...اخوان نامو انتو وجهالكم من وكت وطلعو قبل الوقت لان متدرون شنو الظروف وخلو قبل يوم المقابله يوم راحة مو اتطلعون تسوكون للسفرة قصدي المقابله ولاتنسون تاخذون ادوية للاطفال والكم ، وكل هوياتكم والجوازات ودفتر الخدمه موتنسوهه...اي شي عدكم سوو قائمه (جيك لست ) قبل باسبوع وحضروهه قبل بوكت...وطبعا لتنسون قبل مطلعون من البيت صلوا صلاه قضاء حاجة وادعوا...ادعيلكم مقدما بمقابله ميسرة وسهله.

طبعا اهم شي تكعد انت وزوجتك تراجعون القصة والتواريخ وخلي واحد يسال الاخر اساله يشوف شلون حيجاوب وبيكم خير واخترعو اساله ربما وحدة من هاي الاساله حتنطرح عليكم...حتى اولادكم علموهم ونبهوهم لان المحلفين في بعض الاحيان يطرحون عليهم اساله بأطار المزح بس همه الهم قصد بيهه.

بالنسبة للحركات وامكانية كشف الكذب ...فلازم تكون مقتنع بكلامك ..لان اذا انت اصلا ممقتنع بالكلام اللي تكولة شلون حتقنع الاخرين ! احنه منكول كذبوا بس اذا اكو اضافات قليلة منا ومنا احجيهه بثقة مو بتلكوء وتضل تحك بخشمك لو تعدل نظاراتك لو تحك بعينك او شعرك او اذنك ...اوكلسع تبلع ريكك ...طبعا لتشوفوهه صعبة انتو بس استرخوا حفظوا التواريخ والاحداث وهاهية وماكو واحد بالعراق ممتأذي من ورة الضروف الصارت ومامر بظروف صعبة...المحلفين ناس محترمين وظيفتهم يحققون فانت لا تتنرفز ولا شي ...

المحلفين رايحين جايين قريب من القاعه والكاميرات بكل مكان ...اكو ناس تدخل يم المحلف تبكي من ورة ضروفهه الصعبة وبس تنتهي المقابلة ويودوهم للقاعه الصغيرة تشوفهم مفرفشين وضحك وسوالف.

نجي للاسأله ...طبعا مو كل شخص حيسألو كل هاي الاسأله ...احنه ربع هاي الاساله مسألونياهه...بس هاي مثل ماكلت 80% من الاساله المتوقعه...حتلاحظون انه اكو اساله جاوبت عليهه باكثر من اجابه حتى كل شخص يختار الاجابة القريبه من قصته وطبعا هو اذا عنده اجوبه احسن فخلي يعتمدهه وياريت يذكرهه حتى يستفاد منهه الجميع...المهم انت اختار الاجابة اللي تحس مسيطر عليهه ومقتنع بيهه حتى هم تحفظهه بسرعه وهم من تجاوب كدام المحلف تتكلم بثقة وضيف عليهه اذا تحب بس كون اضافه مفيدة مو تضرك.

طبعا في بداية المقابلة يكولوك اوكف وارفع ايدك اليمين واقسم تكول الحقيقة ؟ انت طبعا توكف وتكول نعم.

في البداية ...معلومات عامه عنك وعن افراد عائلتك...اسمك وتاريخ ميلادك الكامل ونفس الشيء بالنسبة العائلتك واماكن ولادتهم والتحصيل العلمي . بعدين يطلب المحلف نسخ اصليه او مصوره ، (جنسيه...شهادة جنسيه- مو شرط الاصلية) ، جوازات (الاصليه) ، باجات، شهادات ، عقد الزواج ، عقد الطلاق ، دفتر الخدمه العسكريه, اوراق حضانه الاطفال ، اوراق سماح الاب للاطفال بالسفر الى امريكا ( في حالة الطلاق) ، بيانات الولاده للأطفال، ، كتب تزكيه، كتب التعيين، رسائل تهديد.

الاسأله المكررة

هل انت محكوم بجريمه جنائيه او جريمة ارهاب او جريمة مخلة بالشرف؟

شاركت باخفاء اشخاص الهم علاقة بعمليات اجرامية؟

دافع مبالغ لشبكات ارهابيه؟

ماذي احد كونه يحمل ديانه اخرى مغايرة لديانتك؟

متبني طفل امريكي سابقا؟

دافع فديه ؟

مقدم على فيزا سابقا لامريكا؟

زرت امريكا؟

العسكريه: (نقلا عن احد الاخوة)

لابس عسكرية؟

ليش لبست عسكرية؟

شوكت لبست عسكرية ؟

وين لبست عسكرية:

شنو اتعلمت بالعسكرية؟

شوكت تسرحت؟

شلون اتسرحت؟

زين ليش مدفعت بدل مال 3 اشهر؟ متقبل الحكومه هاية 3 اشهر هية خدمه العلم في العراق وهية الزامية

العراق:

شوكت طلعت من العراق :

كم مرة رجعت للعراق وشوكت وشنو السبب؟ ...هذا السؤال حيكررو باكثر من صيغه.

السفر الى خارج العراق

الدول اللي سافرتلها والاسباب ...تواريخ السفر والعودة .

اللجوء

هل قدمت على طلب توطين بغير دائرة الهجرة ؟ نعم في ال يو ان ،واللي طالب لجوء بغير دوله خلي يذكر الدوله.

ماهي اسباب الرفض؟

شلون سافرتو لهاي الدوله والتاريخ وشلون رجعتوا وشكد بقيتوا هناك؟

ملاحظة /...جيبو شكو اوراق رفض اخذتوهه من الدوله اللي رفضت لجوءكم واهم شي تكون مذكوره بيهه اسباب الرفض وتكون الاوراق مترجمه مو تنطوهه بالالماني لو بالسويدي... ترة اذا متقدمون هاي الاوراق كبل يعلقون ملفكم.

اسئلــــــه اضافية مهمـــه

1- بالنسبة للشخص اللي صارلة زمان طالع من العراق ومراجع...السؤال هو ..التهديد صارلة اكثر من 5 سنوات مثلا فليش تتوقع الحد هسة انت مهدد؟

ج1/...الارهابيون لايعتمدون على التاريخ والوقت لكنهم ينتظرون اللحظة المناسبة لتنفيذ تهديدهم حتى لو بعد سنوات من تهديدهم وهناك الكثير من الناس قتلوا بعد فترة من تهديدهم ظنا منهم ان التهديد انتهى.

ج2/ بالنسبة للاشخاص العاملين مع الامريكان...التهديد اجاني على اساس انه اني شخص متعاون مع الامريكان وعميل لهم وهاي الحقيقة اصبحت عند هؤلاء الارهابيون وبرأيهم لازم اعاقب على خيانه البلد حتى ولو بعد سنوات ، فاني شخص لصقت به هذه التهمه ولازم اخذ جزاءي بالقتل.

أما بالنسبة للاشخاص اللي راجعين للعراق ..فخلي يذكر اسباب مقنعـــه كحصول حالة وفاة او مرض احد المقربين...الخ

ملاحظة / المحلف حيسالك شنو معنى عميل...الجواب...خائن للبلد (هذا السؤال انسأل الجيرانه).

2- اذا رجعت شمدريهم الارهابين انه انت رجعت؟

ج/ الامكانيات الاستخباراتية لدى الارهابيين واسعه.

3- للعاملين مع الامريكان...كيف عرفوا القاعده انك تشتغل مع الامريكان؟

ج/ عادة يراقبون الداخل والخارج الى القواعد العسكريه ويتبعوهم الى منازلهم.

4- كيف عرفت انه التهديد اجه من القاعده او من الميليشات ؟

ج/ لانهم كانوا نشطين في تلك الفترة.

ملاحظة: اللي يذكر كلمه الارهابين حيساله المحلف مباشرة منو قصدك بالارهابيين؟

5- عندك نيه ترجع للعراق اذا صار الوضع احسن وليش؟

ج/ ماعندي نية نهائيا ارجع للعراق لانه توجد خلايا نائمه تنشط بأي وقت ومتى ماتوفرت لها الظروف.

6- ليش متستقر بكردستان ؟ هناك الوضع مستقر.

ج1/ يحتاج البقاء في كردستان الى اقامه تتم عن طريق كفاله كردي ..ولايحق للاطفال الدراسة بدون اقامه...كردستان جزء من العراق لكن لديهم حكومتهم المستقلة .

ج2/ اكو اخوان يكولون الاكراد عنصريون واللغة هناك مختلفة ...الخ ( اني ما احب هيجي جواب).

7- ليش متروح الغير محافظة او ليش متغير مكان سكنك؟

ج/ القاعده والمليشيات موجودين بكل المحافظات والتفجيرات والارهاب طال العراق من الشمال الى الجنوب والامكانيات الاستخباراتية لدى الارهابن واسعه.

# سؤال محلف:.شلون عرفت امكانياتهم الاستخباراتية واسعه.؟..جواب...لان حتى الوزير اللي عنده حرس خاص بي يعرفون منين حيفوت وين حيروح ويحطوله عبوة ناسفة بالطريق.

8- اذا كنت مهدد ليش متروح تشكي عند الشرطة؟

ج/ الاجهزة الامنية تحوي على عناصر تنتمي الى المليشيات والاحزاب وهناك عناصر من الشرطة مشاركة باعمال ابتزاز وتهديد وقتل ضد المواطنين واني اخاف يبيعوني للمليشيات.

9- هل الحكومة الحالية تحميك؟

ج/ كلا..لان الحكومه غير قادرة على حمياة نفسها، فلا يستطيع اي مسؤول التجول بحرية خوفا من تصفيته من الارهابيين او من احزاب او ميليشيات في داخل الحكومه بالاضافة الى خفق الاجهزه الامنيه بحماية المواطن.

10- منو احسن قبل 2003 لو بعد 2003؟

قبل 2003 كان هناك نظام دكتاتوري مجرم ادخل الشعب بحروب وكان سالب لحرياتنا.

بعد 2003 توجد ديمقراطية لكن الدوله غير مسيطرة على البلد وهناك مليشيات وطائفية وفساد اداري.

11- للي مامنتمي الحزب البعث...ليش منتميت الحزب البعث؟

انا لا اؤمن بهذا الحزب وقد طلب مني الانتماء ولكن تحججت بالدراسه وعادة يجبرون طلاب الماجستير والدكتوراه او من يشتغل لدى الحكومة.

- للي منتمي الحزب البعث...ليش انتميت الحزب البعث؟

كانوا يجبروننا على المشاركه ولكني لم اكن احظر الاجتماعات بحجج الانشغال بالدراسه وغيرها.

12- هل انت سني ام شيعي؟

انا مسلمه اولا...لا يوجد فرق بين شيعي او سني والطائفية هي سبب دمار العراق.

بالنسبه اللي شخصيا بالمقابله الاولى رفضت اجاوب واكتفيت بقولي مسلمه وبالمحلفين بس سالوا عن الديانه.

13- بالنسبة للعاملين مع القوات المريكية؟ هل انت نادم على العمل مع القوات الامريكيه؟

اكيد لا...والا لماذا انوي الذهاب الى امريكا.

14- ليش متبقى بالاردن؟

انا عراقي في بلد غريب ليس لدي اي حقوق ولا اقامه وباي لحظة نطرد الى خارج البلد.

بالنسبه للي عدهم اقامه...اني عندي اقامه دراسة او عمل ..الخ وكلها اقامات سنوية ويمكن ان تنسحب منا او تلغى باي وقت.

15- شنو اللي صار وياك بحيث اتاذيت منه جسميا او عقليا؟ أو هل انضريت بحياتك؟

انتبهوا على هذا السوال...هذا سؤال ابو اللوفه...اكو اخوان يجاوبون والله توفه ابويه او انكسرت رجلي ومنهالحجي ..همه قصدهم على التهديد اللي اجاك او الظرف اللي عانيت منه بحيث خلاك تترك البلد.

ج/ التهديد اتأثرت بي نفسيا واللي مضروب بطلقة او متأذي يكول جسميا وعقليا.

16- تروح لجوء الغير دولة؟

ج/ نعم اذا كانت دولة امنه والقانون سيد الكل ودوله تضمن حقوقي وحقوق اولادي.

17- لماذا تذهب الى امريكا؟ او شنو رايك بامريكا؟

ج/امريكا بلد الاستقرار والامان وبلد القانون واحترام الانسان.

18- شنو اللي خلاك تشعر بان امريكا زينه؟

ج/اللي عنده كفيل يكول الكفيل حجالنه على الامتيازات واحترام الانسان والحرية واللي ماعنده كفيل يكول اصدقائي بامريكا كالو كذا وكذا.

19- من توصل الامريكا شتسوي؟

ج/ ادور على عمل واتقن اللغة .

20- اذا رفضتك امريكا شتسوي؟

ج/ احزن واحاول اشوف دوله ثانية للتوطين.

21- اذا قبلت الاردن تخليك لاجيء عندها تقبل وليش؟

ج/ لا.. لااقبل..لان الدول العربيه ليست امان للاجيء وقوانينهم متغيرة وليس هناك حريه التعبير.

22- تتزوجين امريكي او تتزوج امريكيه؟ (سؤال انسأل الزوجي)

ج/نعم.

23- تتوقع الحال اللي وصل اله العراق بسبب جيش المهدي ام القاعده؟

ج/ كلهم.

24- ليش الارهابيين دائما يستخدمون سيارات البي ام؟

ج/ يمكن لانها سريعه.

25- عندك علاقة عاطفية حاليا؟سابقا؟

ج/ الجواب بكيف الواحد.

26- لماذا تتزوج الان او لماذا لم تتزوج لحد الان؟

ج/ اتزوج حينما استقر ويكون لي بلد امن وقانون يحميني...او تزوجت للاستقرار وتكوين عائله.

27- هل لديك اقامه في الاردن او لا؟

لا ليس لدي اقامه ...

# سؤال محلف: وكيف باقيين بالاردن من غير اقامه...ج/ غير قانوني.

بالنسبه للي عدهم اقامه يذكرون اقامه دراسة او عمل ..الخ.

28- هل تحب اولادك؟

ج/ اكيد.

29- اين تقع المحكمه التي تزوجت فيها او اين تقع المحكمه التي تطلقت فيها؟

ج/ مكان المحكمه يذكر.

30- هل وقفت امام قاضي؟

ج/ بالنسبة للمتزوجين ...نعم عند الزواج، لغير المتزوجين لا او حسب القصه.

31- دخلت سابقا محكمه؟

ج/ الجواب حسب القصة.

ملاحظة: اكو ناس سالوهم وكفت سابقا امام قاضي كال لا ...وراهه سالوهم دخلت محكمه سابقا كال نعم..جان يسالو شلون دخلت محكمه وموكفت كدام قاضي ..الجواب دخلت اسوي معاملة او من هالقبيل.

32- هل عندك مبلغ بالبنك؟

ج/ كلا

33- هل لديك سلاح في البيت؟

ج/ كلا.

34- ماهي الغالبية الدينية في منطقتكم؟

ج/ شيعية او سنيه حسب المنطقه.

35- هل سابقا اخذت بصمات اصابعك العشر او اصبع واحد؟

ج/ للي عنده اقامه بالاردن واللي طالب لجوء بدوله اوربيه يجاوب نعم بالنسبه لل 10 اصابع...بالنسبه للاصبع الواحد الجواب للجميع نعم

عند عمل شهادة الجنسية عمل وكالة او شهادة حياة...الخ.

بآخر المقابلة ..حيكلك المحلف او المحلفة بانه مو هو بس صاحب القرار بالموافقة لكن يوجد ايضا السوبرفايزر ولجنه مسؤولين عن اصدار القرار ويكلك المحلف انه المترجم هو شغلته فقط ترجمه وما اله دخل بالموضوع ويكلك القرار حتاخذه منا ال 3 اسابيع.

اتمنى يا اخواني واخواتي ان تكونوا استفدتوا من المعلومات اللي طرحتها... ومن الله التوفيق ...