1- اذا اتعرضت لمضايقات في بانكوك كبر دماغك و طنش, مع العلم ان الشعب التايلاندي من أكتر الشعوب المسالمة في العالم، بس صدقني دي من أهم نصائح السفر لبانكوك عشان تضمن رحلة خالية من المشاكل.
2- بالنسبه للشوبنج: ماتفاصلش في السعر لو معندكش نية إنك تشتري, وفي نفس الوقت لو لاقيت حاجه مش مكتوب عليها سعر فاصل للقاع (يعني نزل من 50- 80 % على الأقل) وبعد ما تقوله آخرك سيبه وامشي لو السعر مناسب هينادي لك تاني.
3- من أهم نصائح السفر في بانكوك حاول تتجنب ركوب التوك توك في بانكوك و لكن في بوكيت عادي بس اتفق على السعر قبل الركوب, و لو قالك هوديك المطعم الفلاني ولا المساج العلاني, إعرف إن هيتم استغلالك أحسن استغلال في المكان ده.
4- اذا ركبت تاكسي في بانكوك اتأكد إنه يشغل العداد (علشان تاخد أحسن سعر) أو على الأقل اتفق معاه على السعر قبل ما تركب (علشان محدش يغشك).
5-اذا نزلت من التاكسي في بانكوك اتأكد من أن كل حاجتك معاك والأحسن لا تأخذ معاك في الشارع أي ممتلكات قيمة ككروت البنك أو البطاقات أو جواز السفر وخلي كل ده في خزنة الغرفة. و لو بنت متخدش معاها أي دهب في السفر لى بانكوك
6- لا تسخر من ملك تايلند أو تماثيلهم ودي هتلاقيها في كل مكان في الشارع ( الموضوع ده مهم جدا ) و اذا حبيت تتصور مع راهب (اللي بيلبس برتقاني ده) استئذن قبل ما تصوره.
7-نصيحه كمان من نصائح السفر الى بانكوك اشتري شريحة اتصال وفيها إنترنت ،على فكرة رخيصه جدا, وممكن تشتريها من المطار في بانكوك (بس اتأكد ان الموظف يشغلهالك وانت بتشتريها).
8-بالنسبه لتحويل الفلوس: قبل ما تسافر من مصر الى بانكوك حول معاك جزء من المبلغ (بات تايلاندي) يعني حوالي ربع المبلغ, والباقي خليه دولارات, وهتلاقي هناك محلات صرافه كتير جدا.
حول منها على قد صرفك, يعني متحولش كل فلوسك تايلاندي أول ما توصل. لو اتزنقت ممكن تسحب بكارت البنك المصري من أي بنك في بانكوك ولكن بياخدوا عمولة على كل عملية سحب, فحاول تاخد ما يكفيك من فلوسك كاش.
9- الشراء بالفيزا أو الماستر في بانكوك آمن جدا ولكن حاول تستخدمها على نطاق ضيق في المحلات المعروفة فقط وحاول تحط ستيكر على الـ3 أرقام اللي ورا الكارت (CCV)، وصدقني دي واحدة من أهم نصائح السفر الى بانكوك
10-اذا اجرت موتوسيكل او سياره مع تأمين في بانكوك – شركه التأمين لن تأمن لك اذا ما عندكش رخصة تايلنديه – فإذا عملت حادث (لا سمح الله ) انت اللي هتدفع كل شي (فخلي بالك محدش يضحك عليك و يقولك دي متأمن عليها).
11- نصيحة أوعى تحت أي إغراءات أنك تؤجر جيت سكي من أي مكان في بانكوك (ولو ببلاش) لأن أغلبهم هيقولك أنت خربته أو كسرته و هيخليك تدفع اللي وراك و اللي قدامك، ودي من أهم نصائح السفر الى بانكوك
12 – خلي بالك من العروض اللي اسمها (بينج بونج شو): هتلاقي ناس بتقولك العرض مجانا وادخل ومش هتندم, بس لو دخلت لازم تطلب وإزازة السفن هتلاقي سعرها 250 جنيه على الأقل, فالأحسن تجنب الأماكن دي.
و مع ذلك بانكوك تايلاند من الدول السياحية الاًمنه جدا والمحبة للسياح لأن السياحة في تايلاند هي أهم مصادر الدخل للدولة, ولكن في كل دولة زي ما فيها الحلو فيها الوحش. فخليك حويط وإعرف الوحش علشان تاخد الحلو بس.
العربية
