حمدان المري<br><br>شاعر قطري صاعد، له العديد من القصائد باللهجة العاميّة، وقصيدة (تعبت من بعض العلاقات) من تلك القصائد الرائعة.<br><br>قصيدة تعبت من تعديل بعض العلاقات<br><br>تعبت من تعديل بعض العلاقات<br><br>اللي تبي كل أربع أيام تعديل<br><br>وتعبت أصامد طيش الأيام بسكات<br><br>وأنا مانا أتعب في وجيه الرّياجيل<br><br>وتعبت من حب على غير مشهات<br><br>وأنا اعتزلت الحب وملاوع الويل<br><br>أثر المحبة فالزّمن ذا دعايات<br><br>وحنّا بجيل وصادق الود في جيل<br><br>اللي يقول أنّ الوفا حي ما مات<br><br>كنّه اللي شاهد في الضحى نجمة سهيل<br><br>إمّا تأثّر بالقصص والروايات<br><br>وإلا مع اللّي صدّقوا كذبة إبريل<br><br>ياما سهرنا والسهر بعض الأوقات<br><br>ما من وراه إلا الشّقى والغرابيل<br><br>وياما كتبنا يا قصيدي والأبيات<br><br>في غير أهلها ما تردّ المحاصيل<br><br>بنات فكري خيل مربط جزيلات<br><br>ماهو بمربط أفرق السوم وتشيل<br><br>نعسفها عسف المهار الأصيلات<br><br>إيلين ملينا من عسافة الخيل<br><br>ياليل جفني من عنا الوقت ما بات<br><br>كن في ضلوعي دق نجر ومعاميل<br><br>ليت الغلا للي تودّه من الذات<br><br>يمحاه صبري والليال المقابيل<br><br>لو البكا بيفيدني، رد الأموات<br><br>ولو الجفا بيضر ما عاد بي حيل<br><br>تدري البكا من سابع المستحيلات<br><br>عيّت عيوني ترخص الدمع ويسيل<br><br>سلّم على اللي تحسبنها إلى جات<br><br>بتعين ضلوع جفتها مداهيل<br><br>يا رخصها من عقب ذا الليل بالذات<br><br>ويا غليها غلياه قدّام ذا الليل<br><br>رح قل لها لبلادها (ست) رحلات<br><br>تختار وتعجل ومن دون تأجيل<br><br>تقفي ولا تكثر علي التلفات<br><br>أهل مصر ما تبكي إلا على النيل<br><br>ما عاد عندي غير قطع العلاقات<br><br>اللي تبي كل أربع أيام تعديل<br><br>قصائد أخرى للشاعر<br><br>من جميل ما نظمه الشاعر اخترنا لكم ما يأتي:<br><br>الأماكن<br><br>البرد لهفة شوق والليل ساكن<br><br>وأنا تشفّقت اللقاء واحتريتك<br><br>الله عطاني إيّاك وأصبحت واكن<br><br>على الله أنّي لا بغيتك لقيتك<br><br>مؤمن بما يكتب لي الله ولكن<br><br>بليت نفسي فيك عشق وبليتك<br><br>تغيب وعيوني عليك يتباكن<br><br>لو أنك تسقيني الوصل ما ارتويتك<br><br>خليت حسرات الزّمان يتراكن<br><br>بين الرجاء والياس ليتك وليتك<br><br>داويت جرح من قسى الوقت ماكن<br><br>وإلا فتعطيني ربع ما عطيتك<br><br>وخليت ناقلت الهروج يتحاكن<br><br>ومن كثر ما أجحد أحسبني نسيتك<br><br>ما شفت قلبي والعيون يتشاكن<br><br>أغير منهم من كثر ما هويتك<br><br>سريت لك مشتاق والليل داكن<br><br>يستر ظلامه وقفتي عند بيتك<br><br>تقول حبّك بين الأضلاع راكن<br><br>وأقول هذا اللي ذبحني وجيتك<br><br>سمعتني محمد يغني (الأماكن)<br><br>وأسمعك (واحشني موت) وفديتك.<br><br>الحب الأول<br><br>أقول بنسى وأحسب أني نسيته<br><br>الحب الأول صعب نسيان راعيه<br><br>عانيت في بعده كثر ما هويته<br><br>لا احتلّت في قربه ولا نيب ناسيه<br><br>لو أني أقدر جيته كان جيته<br><br>اللي بقوله آه ويلي على أجيه<br><br>بس البلا أني كلّما جيت بيته<br><br>أخذ ثلاث أيام مدري (شنا) فيه<br><br>ليل ونهار وليل واللي قفيته<br><br>وأنا ما بينا اسمه ورقمه وطاريه<br><br>الله عطاني من غلاه وعطيته<br><br>وغيره بغى مني ولانيب معطيه<br><br>قالوا هويته قلت إيه هويته<br><br>قالوا تركته قلت ماني مخلّيه<br><br>له منزل في وسط روحي بنيته<br><br>جدرانه ضلوعي وهو ساكن فيه<br><br>دوّرت له بين الضلوع ولقيته<br><br>خلف الضلوع يبين (ماطى) خطاويه<br><br>واليوم لا أحتجت اللقا ما احتريته<br><br>حتى ثره من بين الأضلاع ما حيه<br><br>يا جعل يسقى عادني لا بغيته<br><br>يغفى على ضلعين صدري وأصحيه<br><br>ما فيه شخص في حياتي بكيته<br><br>إلا الذي قد مات مانيب راجيه<br><br>لكن هو حي ومع ذا رثيته<br><br>من قلبي اللي أحسن الله تعازيه<br><br>حمّلت قلبي بالهموم ورجيته<br><br>كني ما عرف إلا غيابه وأحاتيه<br><br>أقول بنسى وأثرني مانسيته<br><br>الحب الأول صعب نسيان راعيه.<br><br>أستأذنك<br><br>أستاذنك بسافر أيّام وآجيك<br><br>وإن طالت أيام السفر لا تحاتي<br><br>حتى ولو طولت ماني مخلّيك<br><br>ياللي بدونك ويش تسوى حياتي<br><br>تامر على حاجة بودّعك وإليك<br><br>عسى عوض الأيام فالمقبلاتي<br><br>حتى يدي ما ودها تفارق يديك<br><br>ساكت وأنا أشوف البلا في سكاتي<br><br>ما شفتني لا رحت منك التفت فيك<br><br>بلاي والله روحتي والتفاتي<br><br>لكن قبل ما أروح ودّي أوصّيك<br><br>وأنت الوحيد اللي يقدر وصاتي<br><br>لحدن سألك وقال لك وين مغلّيك<br><br>قل له لوازم لا قضاها بياتي<br><br>وإن طروا النسيان ماني بناسيك<br><br>يا راس مالي فالحياة وغناتي<br><br>وإن طروا السّلوان ماني بساليك<br><br>طيفك معي حتى وأنا في صلاتي<br><br>قلبي وهو قلبي إذا مرّ طاريك<br><br>لولا ظلوعي كان عزّوا مماتي<br><br>لو جض صدري كان يمديه ياتيك<br><br>ويبات عندك ويهنا بالمباتي<br><br>أنا وقلبي والغلا ساكن فيك<br><br>وأنت وقلبك والغلا وسط ذاتي<br><br>غلاك مثل الحكم عند المماليك<br><br>أكبر طموحي، لا، كل أمنياتي<br><br>شف في غيابي أي حاجة تسلّيك<br><br>لنّي بعدك أسلّى مع ذكرياتي<br><br>أحاول اذكر أي شي يطريك<br><br>وأقول هو سوا وأنا ذي سواتي<br><br>كني موادع كل شي حواليك<br><br>وكني حسبت حساب حزت وفاتي<br><br>أحب لني ما أقدر أنساك وأبيك<br><br>ولا أقدر أخلّيك ياللي تحاتي<br><br>معنى أحبّ وما أقدر أنسى وأخلّيك<br><br>يعني بدونك ويش تسوى حياتي.<br><br>برج القاهرة<br><br>يا محمد اخلص لا تطوّلها وهات المختصر<br><br>لا تنشد إلا من مياه النيل وبرج القاهرهْ<br><br>لاعاد تسألني وش اللي مبطي بي في مصر<br><br>ليت العيون النايمة سوّت سوّات الساهره<br><br>البارحة عند العصر ما كن حن عند العصر<br><br>غشى سواد الليل عين اللي زمانه قاهره<br><br>من يوم شفت أم العيون السود ضامرة الخصر<br><br>وأنا أتحاشى شوفها وإلا عيوني جاهره<br><br>علي الحرام إن كنها تعصر معاليقي عصر<br><br>إلى استمال عويدها اللي كن ربي صاهره<br><br>لو إن ما هي تستاهل أنّ زين الملا فيها حصر<br><br>ما كان حتى عروقها من خلف يديها ظاهره<br><br>قامت وقام الناس ومن جاء بيتعدها قصر<br><br>حسبي عليها إن كنها على التغنّج ماهره<br><br>خلت جماهير الهلال اتشلشل أعلام النصر<br><br>نادي النصر من لبسها شهر وربي شاهره<br><br>لو أنّي معها في عريش أخير من بيت وقصر<br><br>منزالها يسمو على كل البيوت الباهره<br><br>هذي مصر وإذا بغيت تعرف وش معنى مصر<br><br>اشرب مياه النيل ولا ذُبْ برج القاهره.