ناس كتير قوي بتحمل هم الإقامة في السفر، باعتبارها شيء مجهول للي مسافرش قبل كده، وكمان لأن في ناس بتشوف الإقامة مجرد فندق بس، والفنادق غالية، وده معناه إن مصاريف كتير احنا مش قدها، ويمكن ده بيخلي ناس كتير تخاف من فكرة السفر في حد ذاتها.
الحقيقة إن الإقامة في السفر أنواع كتير، بتبدأ من الفنادق اللي الناس بتخاف من أسعارها الغالية، وحتى الإقامة المجانية، مرورًا بفنادق رخيصة، وهوستيلز، وكمان استئجار سرير في شقة، أو حتى شقة كاملة وبتكون أرخص من فنادق كتير، “الرحالة” هيقدموا لكم سلسلة تقارير خلال الفترة الجاية (ده أولها) توضح لك أنواع الإقامة وازاي تسكن بمبالغ رخيصة جدًا وببلاش في كل دول العالم.
في التقرير ده هنقدم 4 أنواع من الإقامة، وفي التقارير الجايه هنتكلم عن كل نوع بشكل مفصل، وازاي تقدر تستخدمه، بس في كل الأحوال مهم نوضح كام نقطة:
أ. وانت بتحجز في أي من أنواع الإقامة التالية لازم تشوف الخدمات اللي بيقدمها، وتشوف تقييم الناس اللي نزلت فيه قبل كده، من على الموقع، وكمان تشوف تعليقاتهم.
ب. لازم تبص على الخدمات اللي بيقدمها، يعني مثلًا، هل الضريبة مدفوعة ولا منفصلة وبتضاف على المبلغ، هل في إفطار ضمن المبلغ، هل في مثلًا مشروبات مجانية، هل إلغاء الحجز عليه رسوم ولا لا.. إلخ.
ت. مهم جدًا وانت بتحجز أي مكان، خاصة لو كان جديد، إنك تحجز في البداية ليلتين بالكتير قوي، لأن أحيان كتيرة المكان مبيكونش زي الصور المعروضة، فبالتالي تقدر تغيره لو معجبكش من غير ما تدفع فلوس.
أما أنواع الإقامة فهي كالتالي:
1- الفندق
الفندق هو خيار الإقامة الأشهر لدى المسافرين والسياح، يمكن مش هو الأشهر مثلًا أو الأفضل عند الرحالة، بس ده مش معناه إن منحجزش فندق، لأن في فنادق بالفعل بتكون رخيصة وكويسة، وأحيان كتير بيكون نازل عروض على القنادق، وده تقدر تتابعه من على موقع أو تطبيق booking.com، اللي تقدر من خلاله تعمل فلترة للبحث بتاعك وتبحث على فنادق بأسعار محددة أو من الأرخص للأغلى.
2- الهوستيل
والهوستيل بيكون عبارة عن فندق صغير، وطبعًا بشكل أبسط بكتير، وبيكون عبارة عن غرف، بسعات مختلفة، يعني مثلًا ممكن تلاقي غرفة لفرد، وغرفة لفردين أو ثلاثة، وبتوصل مثلًا لغرف فيها 20 سرير. والغرفة في الهوستيل بيكون اسمها Dorm. وفي غرف فردية بتكون بحمام مستقل، بس النسبة الأكبر طبعًا من الهوستيلز إن الحمام بيكون مشترك، وطبعًا المطبخ والصالة، وبيكون لكل فرد خزينة خاصة به.
ميزة الهوستيل، إنه بيخليك تختلط برحالة من كل دول العالم، وتقدر تظبط معاهم رحلتك في الدولة اللي انت فيها، والدول اللي بعدها، وده كمان هيقلل جدًا معاك في المصاريف، بس الأهم من كل ده بجد، إنك بتتعرف على ناس من ثقافات مختلفة، وبتنفتح على الثقافات دي.
في مواقع كتير جدًا تقدر تحجز من عليها الهوستيلز منهم:
Hostelworld.com
Booking.com
3- شقة أو أقل قليلا ????
النوع الثالث هو إنك تقيم في شقة، أو مثلًا تأجر غرفة في شقة، أو سرير فيها، وبالمناسبة النوع ده مش غالي، وخاصة لو انت مسافر مع أسرتك أو مع أصحابك، بالعكس بتكون بالفعل موفرة جدًا، ودي تقدر تحجزها أو تحجز غرفة أو سرير فيها من على موقع: Airbnb.com
4- استضافة مجانية
ودي بتتم من خلال موقع Couchsurffing، اللي بيشترك عليه مسافرين من جميع أنحاء العالم، بيعرضوا فيه استضافة مسافرين في بيوتهم لمدة قصيرة ودون مقابل، كل اللي محتاج تعمله تعمل حساب علي Couchsurfing.com وتبتدي تخاطب الناس اللي في المدينة اللي انت رايحها.
العربية
