فكرت تسافر مكان جديد وسط الطبيعه الخلابة والسفاري وجزيرة من جزر الأحلام ??? فكرت تسافر تنزانيا وزانزيبار 

تنزانيا موقعها الجغرافي في شرق وسط قارة أفريقيا، تطل على المحيط الهندي, يوجد بها أعلى قمة جبلية في أفريقيا وهو جبل كالمينجارو، ارتفاعه قد جبل سانت كاترين 3 مرات!.

العاصمة الفعلية: دودوما

لكن أهم مدينة هي العاصمة السابقة وتعتبر العاصمة الاقتصادية والإدارية هي دار السلام.

العملة: الشلن التنزاني

1 دولار أمريكي= 2180 شلن

بالنسبة للسفر:

التأشيرة بتكون عند الوصول في المطار في تنزانيا لمدة 3 شهور تكلفتها 50 دولار!

– أول اما بتوصل المطار في دار السلام، تنزانيا، بتملا استمارة ببياناتك وتروح خزنة تدفع 50 دولار وتسلمهم جواز سفرك والاستمارة وهتلاقي ظابط واقف بينادي الأسماء للجوازات اللي اتختمت تروح تستلم جوازك والتأشيره منه!.

الأوراق المطلوبة لتعبئة بيانات استمارة التأشيرة في المطار في تنزانيا:

– حجز فندق من علي موقع www.hostelworld.com بتدفع 12% لـ 20% من المبلغ والباقي عند الوصول للفندق!. مفيش هنا هوستلات تماما كلها غرف مفردة في فنادق سعرها من 20 دولار في الليله لحد 600 دولار. اللي أنا كنت قاعد فيه في دار السلام اسمه stay inn بـ 30 دولار في الليلة، مكانه ممتاز في الشارع الرئيسي وجنبك كل المطاعم والماركتات وشركات المحمول!.

عيب stay inn الوحيد إن النت فيه سئ جدا! وفي فندق تاني قدامه اسمه ABC Travelers بس مش عارف سعره!، ملحوظة الفنادق هنا بتكون شاملة وجبة الإفطار!، اعمل حجز الفندق في دار السلام حجزين منفصلين كل حجز مدته يوم واحد وهم يوم الوصول ويوم المغادرة للقاهرة لأنك مش هتحتاج تقعد في دار السلام أكتر من كده لأنها فاضية وكل الأنشطة هتعملها بره.

– شهادة تطعيمات دولية للملاريا من وزارة الصحة ومختومة بختم النسر من وزارة الصحة نفسها، مش من أي مركز بره، وإلا مش هيكون معترف بيها!، ساعات بيسألوا على الشهادة وعليها غرامة 50 دولار!، بس روح اتطعم عشان نفسك وصحتك، الوقاية خير من العلاج! واتطعم حمى صفراء وشوكية بالمرة هيعملوا إجمالي 300 جنيه تقريبًا!.

– حجز طيران ذهاب وعودة، أنا سافرت على مصر للطيران أفضل لأنها بتبقى رحلة مباشرة سعرها 3700 جنيه من مطار القاهرة، (الأسعار الواردة في هذا التقرير قبل تعويم الجنيه)، في أيام التيكت ساعات سعرها بيوصل لـ 15 ألف!، انت دور على أرخص أيام ذهاب وأرخص عودة هتلاقيهم عاملين السعر ده 3700 جنيه.

– الأكل سعره زي مصر مفيش فرق!.

تكلفة الأقل لمدة 11 يوم هو 770 جنيه بمعدل 70 جنيه في اليوم تقرببا من المطاعم.

ملحوظة مهمة جدًا: يستحسن تسافر معاك ورقات 100 دولار لأن أي ورقة أقل من 50 دولار بيحسبوا سعرها 1400 شلن يعني هتخسر تلت قيمة الفلوس اللي معاك، إبعد تماما عن ورقات الـ 1 و5 و10 دولار خليك كل اللي معاك 50 و100 دولار بس!.

أول اما تخرج من المطار هتلاقي أكشاك لشركات المحمول، أقوى شبكة هناك هي Vodacom اللي هي فودافون عندنا، سعر الخط 2500 شلن وهتحتاج رصيد بـ 20 ألف شلن يعني 10 دولار هتستخدم منهم 15 ألف شلن في عمل باقة إنترنت 3 جيجا تستخدمها في Google maps عشان متتوهش وتعرف تستخدم uber، فيس بوك، ويوتويوب وwhatsapp هنا استخدامهم مجاني مش بيتخصم من الباقة!.

– اول اما تخرج من المطار هتلاقي تاكسيات تبع المطار دول غاليين عندهم تعريفة موحدة 35 دولار، خد تاكسي من بره في الشارع وهتكون أجرته 10 دولار.

أفضل أماكن ممكن تروحها واللي بتميز تنزانيا،

تسلق جبل كالمنجارو، غابات سرنجيتي، غابات جورنجور، وجورنجورو كريتا، وجزيرة زانزيبار.

– مفيش مشكلة في التواصل كلهم بيتكلموا إنجليزي.

– متأجرش عرببات هناك لأن شرطة المرور كتير جدا وهتدفع مخالفات رادار كتير قوي! غير كده الشرطة في حالها تماما بعيد عن السياح! أما تشتري شريحة الموبايل إبقى استخدم Uber، أوبر موجودة هنا وسعرها سدس سعر التاكسي هتوفر لك كتير جدًا!.

– متخليش أي حد يساعدك تماما ولا يشيل عنك شنطة ولا يدلك على طريق لأن الناس كلها عايزه تاخد منك تبس هنا، والبقشيش عندهم بيكون بـ الـ 5 دولار!، فتحذير مؤكد ولا تخلي حد يحول لك عملة ولا يشيل عنك شنطة ولا يدلك لأي طريق ولا يعملك أي خدمة مهما كانت صغيرة!، انت مش مشلول ولا فلوسك كتير!، الخدمات هنا في الشارع كلها بمقابل وغالية جدا، ويستحسن تكون مجهز فلوس منفصلة عن اللي معاك قبل ما تدفع أي شيء لأنه لو شاف معاك دولارات أو فلوس كتير بعملتهم هيطمعوا فيك.

جزيرة زانزيبار

زانزيبار هي جزيرة تقع في المحيط الهندي أمام ساحل تنزانيا، كانت مقاطعة تابعة لسلطنة عمان لكن حصل فيها ثورة قتل فيها 20 ألف مدني واستقلت عن الحكم العماني وانضمت لتنزانيا.

في طريقتين للوصول إليها، أول طريقة عبر الجو تبع شركة اسمها Coastal Airline مدة الرحله 20 دقيقة وسعر التذكرة 50 دولار للاتجاه الواحد، أو عن طريق عبارة من الميناء سعرها 35 دولار للفرد في الاتجاه الواحد ومدة الرحلة ساعتين.

تحذير مهم: إوعي تخلي حد يشيل لك الشنط في الميناء أو يحجز لك التذكرة أو يقول لك تعمل إيه أو يدلك على طريق، هياخد عمولة 50 دولار، ومتعبرش أي حد ينادي عليك، تجاهل كل الناس لأنك لو رديت هتدفع 50 دولار، احجز انت بنفسك من الشباك في الميناء وخلي معاك 70 دولار منفصلين تماما سعر التيكت ذهاب وعودة, إوعى تحول دولارات من الميناء سعر الدولار هناك النص يعني لو معاك 100 دولار هيحولوها بعملتهم كأنها 50 دولار حول من بره.

سعر الفندق في جزيرة زانزيبار اللي كنت قاعد فيه غرفه دايركت على الشط، وشط رملي أبيض ممتاز، صاحبته إيطالية وناس كويسين، فدي ميزة إنك هتبعد عن التبس، تكلفة الليلة 41 دولار+ 9 دولار ضرايب يعني 50 دولار في الليلة، الإقامة شاملة وجبة الإفطار اسمه Ebony and Ivory beach hotel مكانه في مدينة Nungwi في شمال الجزيرة.

مدة الوصول للمدينة ساعة و20 دقيقة، وأجرة التاكسي 20 دولار.

أنا شايف إن 3 أيام مناسبين جدا لزانزيبار، متزودش عن 3 أيام إلا لو انت في شهر عسل أو معاك أصحابك.

ملحوظة الشواطئ البيضاء مش موجودة غير في مدينة Nungwi في الساحل الشرقي وشمال الجزيرة.

الأنشطة اللي ممكن تتعمل، ممكن تصطاد في البحر سعر الرحله 15 دولار لـ 3 ساعات،  أو تروح غابات جيرزاني سعرها 20 دولار، أو تعمل سنوركلنج بـ 15 دولار، أو تعمل جولة في stone town تروح بيت العجايب مقر السلطان العثماني القديم بـ 15 دولار، انت ممكن تفاصل وتقلل الأسعار عن كده.

في تنزانيا لازم تكون ناصح، لازم تفاصل تفاصل، وتفاصل لو قالك 50 دولار قوله هم 5 بس اللي معايا، و صمم واثبت على رأيك ???? كان في سلسله عجباني بتتباع بـ 25 دولار فاصلت وجبتها بـ 2 دولار