أكيد كان ليها حلول
وأكيد مننا في طرف مسؤول
كان سهل النهاية تبقى نقطة بداية
لو سعينا لحل وسط معقول
في طرف استنزف اهتمامه
وطرف مشافش إلا نفسه قدامه
طرف كان بيخسر والسكة مش بتقصر
يوميا بيدفع تمن إدمانه
كنتي كل حاجه عكسي وبتشدني
قبلت عشانك أتهد وشخص تاني يتبني
اتغيرت على أمل تتغير يوم لما تحبني
قال يعني الريح هتبقى نسمة لو الشجر ينحني
عشت معاكي فرحة معشتش من آخرها
انتي كل ذكرى ببتسم لو افتكرها
في حاجات وانا بحكي عنك الوجع يقولي أنكرها
الهجر مر اللوم طول الليل صعوبة النوم
تقل الحمل بطء اليوم وسع الفجوة ضيق الكون
مكالمة صلح في انتظارها تقلت الثواني
كل إتصال جريت عليه وطلع من حد تاني
عاملة مش مضمونة من اللحظة الأولى
عشان أسعى إنك تفضلي موجودة
وأضحي من غير ما أسأل ده في مقابل ايه
انتي عايزة حد تكسريه مش تتسندي عليه
أكيد جبت آخري لسبب
مفيش إحساس من العدم
اخترت معشش في ندم
مادام كده كده في ألم
ماهو مش معنى إني قبلت تفتري
مش منطق تبيعي وأشتري
نَفَسي بيطول لو أتغري
لكن جريني في طريق يتجري
رب قشة ضاق لها الصدر اتساعا ً
فهوى كل شىء كحبات العقد تباعا ً
من ساعتها بكابر وبكبت المشاعر
مضغوط من غير ضغوط عشان بعافر
عشان صلب أبان كإن الصعب هان
كإن لوح التلج انا مفيش جواه بركان
انتي فضلتي تزيدي الحمل لآخر نفس فيا
واللي أجبرتيني إني أرسم شرخ في الخلفية
سبتيني وسط وادي الموت ماسك في كوم حجارة
ورافع عملتين الرشوة لقائد العبارة
لو حياتك وقفت كان الوضع اتغير
لكن سرعة شفاكي خليتني أبان صغير
مش قالوا نور اليوم بيدخل من شروخ الأمس
آدي الشروخ في كل سنتي فين الشمس
في الأول والآخر ده نصيبنا
ارتحنا وتعبنا فرحنا وزعلنا
بعدنا ورجعنا اشتقنا وزهقنا
كان نفسي تبوش مشاكلنا
حكيتلك ع الحمل اللي شايله قولتي معاك هشيل
كنت فاكر إني لقيت الضهر وإني لقيت شريك
ومصدقتش إنه طعم وأنا بتشد من المحيط
فجأة النفس يضيق فبنراجع نفسنا
يادوب غمضنا لحظة إزاي وصلنا هنا
يادوب عدينا غلطة معدناش كل ده
يادوب طاطينا مرة إزاي اتداسنا كده
فانا بلومك من غضب انا فيه
كنت شايف عندك أكتر عشانا تعمليه
كنت شايف استهتارك باللي بيننا بيزيد
كنت شايف ورد بيدبل ورافضة تسقيه
اسم الاغنية : العقد
كاتب الاغنية : غير معروف
ملحن الاغنية : غير معروف
غناء : الجوكر
العربية
