واه يا عبد الودود
يا للي رابض عالحدود ..
و محافظ عالنظام
كيفك يا واد صحيح ..
عسى الله تكون مليح
وراقب للأمام ..
أمك عتدعي ليك ..
وعتسلم عليك ..
وتقول بعد السلام :
خليك ددع لابوك (جدع )
( لا يقولوا منين دابوك ) ( جابوك )
ويمصِّخوا الكلام !
&&&&&&&
واه يا عبد الودود
عقلك وانته خابر ..
كل القضيَّة عاد..
ولسّه دم خيّك
ما شِرباش التراب
حسّك عينك تزحزح
يدك عن الزناد
خليك يا عبده راصد
لساعة الحساب
آن الأوان يا ولدي
ما عاد الاّ المعاد ..
تنفضّ الشركة واصل
وينزاحوا الكلاب
إن كنت ودّ أبوك..
تديب لي ثار أخوك
والأهل يبلّغوك
دميعاً السلام ( جميعاً )
&&&&&&&
واه يا عبد الودود
كيفك وكيف زمايلك ؟
عسى الله طيبين ..
خالك زناتي جايلك..
ضمن المطّوعين ..
واختك تطلع يوماتي
عالمِستِشْفى القديمة
حاكم عيمرنوها ..
في العَرْكَة تكون حكيمة
ومحمّدين موافي
يتعلم المطافي
ويقولّك شِد عزمك..
ويقلك العوافي
ومنِهْنا القرايب
والعيلة والعيال
عيبلغوك سلامهم
ولتمّة الرِّجال
وآخر الكلام ..
نقولك في الختام
الله يصون بلدنا
ويحرس السلام
والدك / حسن محارب
(غفير برج الحمام)
اسم الاغنية : اه ياعبد الودود
كاتب الاغنية : غير معروف
ملحن الاغنية : غير معروف
غناء : احمد سعد
العربية
