كلمات اغنية جاي مالريف للعاصمة بلطي.

جاي مالريف للعاصمة
مخلي وريا دعاوي لميمة
من عيلة فقيرة و بو زاولي
لا سمعنا عمدة ولا والي
راكب في لواج سارح بافكاري
نتذكر الفقر تشعل ناري
في الصغرى مشينا قرينا عل الكريتا
في صغري نستخايل مناش في الخريطة
جاي التونس بشهايدي و ديبلومتي
و كتاب قران مدتهولي مماتي
و ولاد عمي تعراضلي في باب عليوة
بعد الحملة والبوس شربنا قهيوة
حكينا عالحاضر و الماضي و على الدشرة
الفقر في دشرتنا صاحب عشرة
لليوم أمي تجيب الماء م السبالا

من باب عليوة للحبيب بورقيبة
مشينا على سقينا شفت الناس غريبة
دنيا زحمة و ناس الكلها تجري
الخبزة غالية كلها تبيع و تشري
شارع ضاوي على يمينك و يسارك
و في دشرتنا شمعة تضوي دارك
على ضو شمعة قرينا و نجحنا
جيت إل تونس بالك فما خبر يفرحنا

جاي مالريف للعاصمة (x8)

عديت أيامات بحذا بن عمي
هو يشكيلي في همو و انا نشكي في همي
كمل القراية و توة عامل نصبة
كان مل الحاضرين في اعتصامات القصبة
وراني برشة خرم وبرشة حكايات
رد بالك اتبع السكرة وبنات
برشة من أولاد جهتنا مالوا
لا خدمة لا والو عمل اللي يحلالو
عديت أيمات نلوج على خديمة
بالك ديبلومتي يولي عندهم قيمة
بابا باع أرضه بش انا نتخرج
ما نحبش يضيع عمري و انا نتفرج
3 شهور نتسكع قدام الافريكا
من بلاصة لبلاصة الشركة إل شركة
بالميتريز متاعي إندادي و نساسي
ما هلكوا لبلاد كان اللي شدوا الكراسي
بدا يوفى عليا زادي و زوادي
بالتليفون نطمن في أمي و مماتي
ديما أحوالي عشرة على عشرة
حشومة كان رجعتلهم فارغ للدشرة
ضربني الصبات بين زناقي المدينة
نشوف في وجوه ولاد العم حزينة
اللي جاي ماترز رصاتلو مرماجي

جاي مالريف للعاصمة (x8)

مرة حمال و مرة في حظيرة
تحت المنغالا تلمينا في تصويرة
الامالي فيبالهم باللي وليدهم هاني
حالي و حال الدشرة هو إلي بكاني
غربة بين ولاد العم و ولاد العمة
غنيتنا كل ليلة اتوحشتك يمة
ادعيلي بالك ربي يسهلهالي
ربي وحدو هو اللي عالم بأحوالي
في قلبي برشة غصة و برشة حسرة
وينك يا ميمة متوحش من يديك الكسرة
شكون اللي حاسس باللي ولد الريف يعاني
تقول عاملين بلعاني ولد الريف براني
ضربتنا لحيوط و ضربتنا البطالة
والقاري فينا شادد البيوش والبالا
كاذب على بنت العمة نخدم بنكاجي
و انا مرة برمان مرة قهواجي
من قهوة القهوة من التبرنا لتبرنا
سكرنا بكاس المر و بكينا على زهرنا
ولد الريف يزوفري و الريف يبكي علينا
شنية ذنبنا في الريف حلينا عنينا
جاي مالريف للعاصمة
مخلي وريا دعاوي لميمة
من عيلة فقيرة و بو زاولي
لا سمعنا عمدة ولا والي



اسم الاغنية : جاي مالريف للعاصمة

كاتب الاغنية : غير معروف

ملحن الاغنية : غير معروف

غناء : بلطي