جوج بنات بغاوني
عزموني و داوني
وحدة مدينية
و وحدة بدوية
البدوية سحرتني
المدينية عشقتني
حار قلبي و احتار
بين شهدة و عسلية
قالت البدوية
أنا مولات الدار
و قالت المدينية
قلت لهم سمعوني
بلا عداوة فهموني
نعدل بيناتكم ديما
بعلم البدوية
خطة رسمو ليا
قالت لمدينية
الليلة الدور عليا
كيف نعدل يا ناس
سكن بالي وسواس
و أنا رهيف الإحساس
بقيت بينهم ندور
بلا غدا و لا فطور
طول نهاري مقهور
و رزقي ضايع ليا
صرخات المدينية
قالت قدام الجار
اليوم لازم تختار
غير أنا و لا هيا
كيف نسامح فيهم
و لا نغدر بيهم
و نا سليم النية
إلى نغيب عليهم
يجيو يسالو فيا
نبدا نصالح فيهم
يعود اللوم عليا
حصلت بين يديهم
نصالح و نهدي
ترجيت الله يهديهم
يسهل لي ربي فيهم
و فيوم من يام الله
قلت لهم الماضي ننساه
تحابو لا تكونوا عديان
و تعالوا دَفنوا لحزان
قالو غير نسى ما كان
ارضينا نكون إخوان
و إن شاءَ الله الرحمان
فبيتنا يسود الأمان
يا سيادي هذا ما صار
و اللي بحالي خصو يختار
غير وحدة كافية فالدار
و لا بيتك لابد ينهار
نحن نستخدم ملفات تعريف الارتباط (كوكيز) لفهم كيفية استخدامك لموقعنا ولتحسين تجربتك. من خلال الاستمرار في استخدام موقعنا ، فإنك توافق على استخدامنا لملفات تعريف الارتباط.
العربية
