حسيت انك ضعيف ومكسور الجناح
مكبوح الجماح معدوم المتاح
بسبب ناس عن جهل قالوا انك مش زيهم مش كامل
كأن الاختلاف دليل على توزيع مش عادل
في ناس كانت بتشدك لورا وتهدك لغرض
في ناس كرهتلك النجاح عشان في قلوبها مرض
قادر والدليل ان الحياة مهزمتكش
من وانت بتحبي وهي بتحاول متقومكش
وقومت خدت أول خطوة غصب عنها
وفضلت تنجح مهما يتقل امتحانها
زي ما ناس كرهتك زي ما ناس حبتك
ما الشىء وعكسه مخلوقين يتنافسوا
غيرك كسب سباق بس خسر نفسه
وانت روحك كانت بتكبر كل ما تكبر
قولت تقدر للي قالك مش هتقدر
الدنيا مبتديكش اللي انت شايفه عليك كتير
ما دام هتحلم اوعى تحلم الا حلم كبير
في ناس وصولها راح هدر عشان لحظة تأخير
سابق بشراسة كإنك بادئ الأخير
الظروف سيوف والدروع إرادتك
عمر التعب ما راح هدر قاوم بكل طاقتك
هما حاولوا يحبطوك خوفا من حركتك
عرفوا ان انت هتعديهم لحظة انطلاقتك
استنى الريح تعدي ويندموا اللي مالوا هوا
يخسروا اللي حاربوا بعض قدام اللي كانوا سوا
تمد ايدك ليهم يفتكروك بترمي طعم
أصل اللي يزرع شر لازم يجني رعب
واما العيوب تبدأ تغطي ع المزايا
وتحبط قبل خطوة واحدة من خط النهاية
وتبص لروحك بشفقة في المرايا
زي ما تكون خلاص صدقت ان انت مش كفاية
بص وراك تشوف طريق طويل اتمشى
هازم في كل مللي فيه ميت احتمال للفشل
اما اللي وقعوك وسبقوا الخوف فيهم متغلغل
بيبصوا وراهم مرعوبين لتقوم تكمل
الدنيا مبتديكش اللي انت شايفه عليك كتير
ما دام هتحلم اوعى تحلم الا حلم كبير
في ناس وصولها راح هدر عشان لحظة تأخير
سابق بشراسة كإنك بادئ الأخير
اسم الاغنية : حلم كبير
كاتب الاغنية : غير معروف
ملحن الاغنية : غير معروف
غناء : الجوكر
العربية
