كلمات اغنية رفيقي الشهيد جورج خباز.
رفيقي الشهيد
اسمعني يا رفيقي الشهيد يللي تركتنا بكير
نفس الغلطة عم منعيد
واللي صار رجع يصير
رجعنا نمشي نفس الدرب ونفتش عماشي
كأنو كل سنين الحرب ما تعلمنا منّا شي
و 30 سنة من الذل يظهر ما بتكفينا
رجع الحقد فينا حل ورجعوا يلعبوا فينا
والشباب بعدا بتفل وعم نسمع صوت القنابل
ورجع الكل يسب الكل وانخلط الحابل بالنابل
ومشيت لغة التجريح والبلد ما شفيوا جراحو
قولك رح تاخدنا الريح
ما بيكفوا اللي راحوا
سبق وشربنا من الكاس وبكينا عالمقابر
ما اشتقنا عخطوط التماس ولا اشتقنا عالمعابر
يا ريت فيك تزورهن يوم مش عم يسمعوا منّي
فيقهن انت من النوم ببلد متل الجنة
قلن يا بشر اوعا ترجعوا لهاك الايام
صار لازم بقا نوعا ببلد بيلبقلو السلام
ما حدا منّا سئلان وعَ وطنو خايف
كل واحد فاتح دكان ليتاجر بالطوايف
يا عالم كل الاديان بتدعي لنكون محبّين
ونحنا منكره الانسان ومنحط الحجة بالدين
قلوبنا صارت من حديد
وما تعلمنا من الماضي
خايف يا رفيقي الشهيد تكون رحت عالفاضي
بنتَك صارت صبية وصار عمرا فوق العشرين
عم بتسأل وينو بيي وبيي استشهد كرمال مين ؟
قلتلا بيّك بدمو دفع حق الحرية
القضية كانت همّوواستشهد للقضية
قالت ايّا حرية ؟ وشو بدي بالقضية
مبارح بحفلة تخرجت وما كان بالحفلة بيي
قلن يوعوا من جديد وما يرجعوا للماضي
حتى يا رفيقي الشهيد ما تكون رحت عالفاضي
ليش ضحكات الاطفال عنّا الخوف بيخطفا
بلدي يا احلى وردة الكل بدّو يقطفا
اسم الاغنية : رفيقي الشهيد
كاتب الاغنية : غير معروف
ملحن الاغنية : غير معروف
غناء : جورج خخباز
العربية
