ماتصبرنيش بوعود
وكلام معسول وعهود
انا ياما صبرت زمان
على نار وعذاب وهوان
وهي غلطة ومش ح تعود
ولو ان الشوق موجود
وحنيني اليك موجود
انما للصبر حدود ... يا حبيبي
---
صبرني الحب كتير
وداريت في القلب كتير
ورضيت عن ظلمك لكن
كل ده كان تأثير
والقرب أساه وراني
البعد ارحم بكتير
ولقيتني وانا باهواك
خلصت الصبر معاك
وبأملي اعيش ولو انه
ضيع لي سنين في هواك
واهي غلطه ومش ح تعود
---
اكتر من مره عاتبتك
واديت لك وقت تفكر
كان قلبي كبير بيسامحك
انما كان غدرك اكبر
اكبر من طيبة قلبي
اكبر من طولة بالي
اكبر من قوة حبي
مع كل الماضي الغالي
ولقيتني وانا بهواك
خلصت الصبر معاك
وبأملي باعيش ولو انه
ضيع لي سنين في هواك
واهي غلطة ومش ح تعود
---
ماتصبرنيش ما خلاص
انا فاض بيه ومليت
بين لي انت الاخلاص
وانا اضحي مهما قاسيت
دامفيش في الدنيا غرام
بيعيش كده ع الاوهام
والحب الصادق عمره
عمره مايحتاج لكلام
ولقيتني وانا بهواك
خلصت الصبر معاك
وباملي باعيش ولو انه
ضيع لي سنين في هواك
واهي غلطه ومش ح تعود
ولو ان الشوق موجود
وحنيني اليك موجود
انما للصبر حدود ياحبيبي
اسم الاغنية : للصبر حدود
كاتب الاغنية : عبدالوهاب محمد
ملحن الاغنية : محمد الموجي
غناء : ام كلثوم
العربية
