كيفية التحضير لـ شهر العسل في تايلاند

1- الباسبور
2- الفيزا
3-تصريح سفر
4- تحضير الشنط متاخدش معاك هدوم كتير ولا جزم هو شبشب أو صندل وهدوم كلها صيفي لأن الجو هناك حر طول السنه تقريبا حتى لو بتشتى هى حر.

رحلة شهر العسل في تايلاند

سافرنا من مطار القاهرة نزلنا ترانزيت فى أبو ظبي وكملنا على بانكوك ومن بانكوك إلى جزيرة بوكيت الرحلة حوالي 22 ساعه حوالى 14 ساعه طيران.

وصلنا لفندق فى جزيرة بوكيت الساعه 1 بالليل بعد ما كان فى عربية مستنيانا فى المطار وصلتنا طبعا دخلنا ننام عشان تعبانين بس الغريب إننا صحينا الساعة 5 الفجر، كأنك نمت يوم كامل وده بسبب فرق التوقيت بين تايلاند ومصر، قعدنا فى فندق اسمه سيرا جراند فندق حلو وهادى والمنظر من شباك الغرفة وهمي وميزته إنه فى نص البلد بالظبط قدامك كل حاجة.

رحلات شهر العسل في تايلاند

أول رحلة في جزيرة بوكيت كانت تانى يوم الساعة 10 صباحا كانت سيتى تور بيجيلك سواق ياخدك من الفندق وبياخدك فى رحله في جزيرة بوكيت لمدة 3 أو 4 ساعات بيلف بيك البلد وبتشوف أحلى مناطق فى بوكيت اللى هتحس إنك ماشي فى حتة من الجنة السواق بيتكلم إنجليزي كويس وهيشرح لك كل منطقة بتروحها.

روحنا مجموعه شواطي في بوكيت وكان بيودينا أماكن تشوف منها البلد كلها، خلصنا الشواطئ طلعنا على معبد wat chalong ده المعبد الكبير فى بوكيت لبوذا حاجه حلوه. طلعنا منه على مصنع الكاجو (كاتشنات) ده اسمه عشان ميعرفوش يعنى إيه كاجو، هتشوف شجره كاجو والثمرة اللى منها وطريقه عمله، وهتجرب أشكال وأنواع من الكاجو ببلاش واللى يعجبك تشتري منه.

الاسواق في جزيرة بوكيت

هتلاقى فواكه مجففه جرب المانجو حتعجبك وبعدها رحنا مكان لبيع الهدايا هناك مكان كبير بس متشتريش منه، جزيرة بوكيت هدايا غاليه جدا وآخر حاجة رحنا سوق محلى لسكان البلد فيه أكل وفاكهة وكل حاجة اشترى منه فاكهة رخيصة وخدها معاك الفندق.

خلصت الرحله وروحنا ريحنا شوية ونزلنا نتمشى البلد هناك بتقفل بدرى الساعه 10 بتلاقى كله بدأ يروح ما عدا شارع البنجالا ده شارع الهلس والمسخره بس روح اتفرج، الجو هناك حلو، بيكون فى ناس فى الشارع بترقص وساحر وكده وممكن تطلع تتمشي على البحر برضه.

ده الجزء الاول و لينا جزء تانى هنكمل فيه باقى رحلات بوكيت