السفر الى السودان ممكن يكون سهل جدا باعتباره دولة حدودية مع مصر. وممكن تزورها بري، يمكن كتير من المصريين ميعرفوش عنها حاجة، رغم اننا كنا دولة واحدة. ومصريين كتير يمكن عندهم معلومات غلط، بس الأكيد ان السودان دولة تستاهل انها تتزار، وكمان زيارتها مش هتكون مكلفة، في التقرير ده هشرح لكم ازاي تسافروا السودان من القاهرة بري، بتكلفة ممكن توصل لـ 230 جنيه.
في اتوبيسات بتطلع من القاهرة لحلفا، وفي حل أوفر: أسوان لحلفا أو من أسوان للخرطوم وأسوان ممكن الوصول ليها عن كذا نوع من القطارات زي الأسبانى أو النوم أو الـ VIP الأنواع دى فيه اللي بيطلع من الاسكندرية وده يبقف فى طنطا قبل القاهرة أساسي وكلهم شغالين طول السنة ما عدا قطر النوم صيف بس.
وفي اللى بيطلع من القاهرة ودي بتكون عددها أكبر فبيكون فرص الحجز عليها أكتر وبرضه شغالة طول السنة حتى قطر من قطارات النوم، والتانى هو اللى بيشتغل صيف بس وأغلى تذكرة فيهم هى الكابينة المفردة فى قطر النوم 500 جنيه شاملة وجبة العشاء أما الكابينة المزدوجة 300 شاملة وجبة العشاء، وأرخصهم الأسبانى وده بيكون على حسب المحطة اللى ركبت منها وكمان على حسب الدرجة أولى مكيف ولا ثانية مكيف.
الأتوبيس من أسوان لحلفا 120 ومن أسوان للخرطوم 400 يعنى الرحلة كلها ممكن تكلف 200 جنيه لو مسافر على أسبانى درجة تانية، وأتوبيس من أسوان لحلفا و900 جنيه لو مسافر فى قطر نوم، ومن أسوان للخرطوم.
طبعا لازم نعمل حساب احتمالية البيات فى أسوان عشان معاد الأتوبيس ففى حلين الأول هو بيت شباب أسوان وسعره 30 جنيه فى الغرف المشتركة أما لو من محبين الخصوصية ففى فنادق حوالين المحطة سعرها رخيص حوالي 70 جنيه للأوضة المفردة بس حمام مشترك أو 120 جنيه لو حمام خاص و150 جنيه لأوضة مزدوجة حمام خاص.
طبعا كده وصلنا لاحتمالية تكلفة من 230 إلى 1050 على حسب دماغ ومزاج وأريحية كل شخص بس لو جينا نشوفها نلاقيه مهما كانت أرخص من الطيران لأنه مكلف جدا تذكرة الطيران من للسودان تعدى عن 2000 جنيه وأكتر.
العربية
