ماذا تعلمت من مهارات التواصل في بيئة العمل؟
التواصل في العمل اله حدود ومحددات؛ وبالتالي فإن أول مهارة في التواصل في العمل هي تحديد ومعرفة هذه الحدود او المحددات .. مثلاً طبيعة تواصلك بالكلام مع مديرك تختلف عن تلك المستخدمة مع زميلك.. طبيعة تواصلك في إميل رسمي تختلف عن تلك اللي بتتواصل بها خلال استراحة الغداء..
الذكاء العاطفي مهم جداً..
ويتضمن فهمك لذاتك وشو الأمور التي تدفعك نحو الانتاج وتلك التي تحبطك أو تؤذيك أو اتضايقك مثلاً إنت "Work-oriented " وللا "People - oriented" .. وانك تكون واضح في التعبير عن نفسك للي أمامك بدون خجل سواء أمور بتحبها أو أمور بتزعجك أو عادات بتتصرفها خلال العمل...
يعني مثلاً انا ما بحب حدا يقطعني وأنا بمكتبي بشتغل خارج أوقات الاجتماع من اجل التحدث بأمور خارج نطاق العمل وليست ذات أهمية.. بحكي للي قدامي بكل ذوق وهدوء هاد الاشي وبنفس الوقت باجي بوقت البريك مثلاً وبسأله عن الموضوع وبنحكي فيه قد ما بده..
ويتضمن أيضاً فهمك للي قدامك .. وكيف تحكي معه وتتفهمه.. لكن بنفس الوقت بدون ما يعطل عمل الشركة او المؤسسة بذريعة انو بتضايق من هالموضوع .. الشغل شغل.. لكن مثلاً شخص اكبر منك واكثر منك خبرة بس لسبب أو لآخر أنت مديره بدك تعطيه أهمية وتشاركه بصنع القرار حتى تخفف شوي من الحسرة انو انت كيف أصغر منه ومديره طبعاً وبنفس الوقت تحافظ على سلطتك وقيادتك للمكان..
تعملت أن اي شيء يتعلق بالعمل يتطلب التوثيق.. سواء إميل أو ورق .. المهم التوثيق.. وسائل التواصل التانية أحياناً بتخيب ظنك.. مثلاً ممكن تعمل شغلة والمدير يحكيلك اعملها زي ما بدك وبس تخلص ييجي المدير يحكيلك أنا ما قلتلك تعمل هيك ! ساعتها ما في اشي بين ايديك يثبت صحة كلامك أو كلامه.. فبتضيع الطاسة.. وإنت بترجع بتعيد الشغل.
الاهتمام بالاخرين ومساعدتهم خلق رائع جداً .. لكن بدك تحاول تتوسط فيه لأنو ممكن تقابل أشخاص تركن وتتواكل عليك وتصير تعمل عنها كل اشي ومع الوقت بصير التطوع واجب! وممكن تقابل اشخاص يقدروك حتى لو أعرتهم المكبس تاعك..
وبالتالي لما تساعد اشخاص يكون واضح الهم انك عم بتساعد ولوقت محدد ولسبب مؤقت..
الثقة في العمل في حدود لوائح العمل.. مو كل الناس بتنصح مشان تفيدك.. في ناس بتنصح عشان تخرب عليك للأسف... فخلي قدامك معيار واضح للحكم على الأشياء اللي هي لوائح وقوانين العمل..
مثلاً أثناء العمل زميلك حكالك: امشي نروح نفطر عالسريع عادي الكل بعمل هيك.. ممكن يكون كلامه صح العادة في الشركة هيك وممكن يكون اسفين بانتظارك.. وطبعاً الأصعب اذا بيكون عملك يتطلب تطبيق "SOPs" معينة دير بالك تقبل استثتاءات بعدم تطبيق اي معيار الا بموافقة رسمية من ادارتك مو من خلال نصيحة من أحد زملائك..
من الجميل أيضاً أن تصنع جو من الايجابية وتحمل المسؤولية في العمل.. والتعامل الذكي مع الاشخاص السلبيين.
من الجميل ان تصنع علاقات اجتماعية مع زملائك في العمل مع التحفظ طالما أنت على رأس عملك.. وتشاركهم مناسباتهم وأفراحهم وهمومهم...
العربية
