معلومات عن السفر الى اسيا

من أكتر من أربع شهور، وأنا بحجز تذكرة السفر الى اسيا وبحدد تاريخ العودة وبسأل نفسي لو فعلًا هقدر استحمل ٤ شهور بعيد عن كل حاجة الواحد متعود عليها، ومش عارفة إيه اللي ممكن يبقى مستنيني. صحيح مش أول سفرية ليا بس دي أول سفرية لفترة طويلة كده.

بالرغم من التوهان اللي أنا دايما عايشة فيه وقلة التنظيم في معظم حياتي (حياتي كلها يا ماما حاضر) والحيرة اللي معيشة نفسي فيه حتى وأنا بختار آيس كريم، خضت مغامرة السفر الى اسيا ولفلفت في 4 بلاد في جنوب شرق اسيا، ابتديت بتايلاند فسح وأكل كتير (كتير بزيادة)، على أماكن اتطوعت فيها زي السينما، اللي قضيت فيها ٣ أسابيع في كمبوديا.

السياحة في اسيا

بعدين عديت على السريع على ماليزيا، وقضيت آخر شهر في إندونيسيا، اللي ختمت بيها مغامرة السفر الى اسيا ، لما طلعت بركان “إيچين” المشهور بالنار الزرقا، اللي تلحقها بالليل بعد أكتر من ساعتين طلوع، وانت لابس ماسك عشان الغاز اللي طالع من البركان، فيحسسك إنك قلبت على Darth Vader.

مغامرة السفر الى اسيا

صحيح في أوقات في رحلة السفر لاسيا كنت حاسة إن دماغي يا هتنفجر يا إما مخي هيفتح الباب ويهرب من كتر ما الواحد بيفكر في الخطوة اللي جاية ويوصل للمدينة الفلانية، إزاي طب باص ولا قطر؟، طب لو رحت هناك هلحق أزور المكان ده؟، يستاهل ولا السياحة دمرته؟، طب هي الميزانية وصلت كام دلوقتي؟، إيه ده هو كارت البنك مش شغال ليه؟، تعليمات البنك المركزي؟! طب وأنا يا مصر؟!، المشكلة دي لوحدها كانت هتقطع السفرية من أول شهر لولا إن الواحد اتكعبل في ناس جدعة مع Paypal، اللي آه خسرني حبة فلوس بس السفرية كِملت.

رحلة اسيا

صحيح الواحد كان متفائل بزيادة ومعرفتش أهرب ورجعت القاهرة ولسه مش عارفة أنا بعمل إيه، وصحيح الواحد اتنازل عن حاجات كتير عشان الـ٤ شهور دول يحصلوا، بس اللي شفته فيهم أكتر بكتير سواء حلو ومش متوقع أو حتى الوِحِش، الواحد مكانش متخيل إنه هيمر بيه، بس مفيش حاجة تخلي الواحد يندم، وقبل ما ذاكرتي تنسي التفاصيل هكمل كتابة المواقف اللي مكانتش هتعدي عليا غير لما احتكيت بالناس وبعدت عن المفاهيم والكلام اللي دايمًا بسمعه من غير ما أكون شوفته بنفسي.

واه رحلة زي دي حصل قبلها حبة نقاشات طويلة مع الأهل، خصوصًا إن مامتي مش بتوافق على سفري لإسكندرية بالقطر لوحدي، بس موقفتش في طريق تجربتي في قارة تانية (سجدة شكر) وكانت دايمًا متبعاني (أو مراقباني) على الخريطة وتروح بعتالي screenshots لمكاني وبتقولي هلاقي محلات إيه حواليا. وسفري لجنوب شرق اسيا المرة الجاية لازم تكون على موتوسيكل!.